Muzokaralar davomida O‘zbekiston voleybol federatsiyasi tomonidan mamlakatimizda voleybolni ommalashtirish, yoshlar sportini rivojlantirish hamda xalqaro standartlarga mos musobaqalarni tashkil etish borasida amalga oshirilayotgan ishlar yuzasidan batafsil ma’lumot taqdim etildi. Xususan, mamlakatimizda muvaffaqiyatli tashkil etilayotgan “Besh tashabbus olimpiadasi”, Talabalar ligasi, O‘zbekiston chempionatlari hamda turli yosh toifalaridagi musobaqalar natijasida erishilgan yutuqlar FIVB rahbariyatiga taqdim etildi. Xalqaro federatsiya vakillari ushbu loyihalarni yuqori baholab, O‘zbekistonda voleybolni rivojlantirish borasida amalga oshirilayotgan tizimli islohotlarni e’tirof etdi.

 Uchrashuvning muhim natijalaridan biri sifatida, FIVB tomonidan 2027-yilda O‘zbekistonda xalqaro o‘quv-mashg‘ulotlar va trenerlar malakasini oshirishga xizmat qiluvchi FIVB Center of Excellence tashkil etish tashabbusi qo‘llab-quvvatlandi. Mazkur markazning ochilishi Markaziy Osiyo mintaqasida voleybol infratuzilmasini rivojlantirish va mutaxassislar tayyorlashda muhim qadam bo‘lishi kutilmoqda. Ma'lumot uchun ushbu markaz dunyo bo'yicha atigi 14 ta bo'lib 15- yurtimizda ochilishi kutilmoqda. Shuningdek, muzokaralar davomida 2028-yilda bo‘lib o‘tadigan U-21 yosh toifasidagi Jahon chempionatini O‘zbekistonda o‘tkazish masalasi ham muhokama qilindi. O‘zbekiston voleybol federatsiyasi tomonidan ushbu nufuzli musobaqaga mezbonlik qilish bo‘yicha taklif bildirildi va FIVB mutaxassislari tomonidan zarur hujjatlar hamda talablar yuzasidan batafsil tushuntirishlar berildi. Ma’lum qilinishicha, mezbon davlatni aniqlash bo‘yicha taqdim etilgan hujjatlar joriy yilning 18–20 noyabr kunlari Dominikan Respublikasida bo‘lib o‘tadigan FIVB yig‘ilishida ko‘rib chiqiladi va yakuniy qaror FIVB tomonidan rasman e’lon qilinadi. Bundan tashqari, FIVB vakillari tomonidan sohil voleyboli bo‘yicha Olimpiya o‘yinlariga reyting ochkolarini beruvchi xalqaro turnirlarni O‘zbekistonda tashkil etish yuzasidan ham takliflar ilgari surildi. Ushbu tashabbus mamlakatimizning xalqaro sport taqvimidagi o‘rnini yanada mustahkamlash, sport turizmini rivojlantirish hamda mahalliy sportchilarning yuqori darajadagi musobaqalarda ishtirok etish imkoniyatlarini kengaytirishga xizmat qiladi.Muloqot davomida voleybol infratuzilmasini rivojlantirish, mutaxassislar tayyorlash, xalqaro hamkorlikni mustahkamlash, yoshlar voleyboli va sohil voleybolini yanada ommalashtirish bo‘yicha qator istiqbolli loyihalar muhokama qilindi hamda tomonlar ushbu yo‘nalishlarda o‘zaro hamkorlikni yanada kengaytirish yuzasidan kelishuvga erishdilar.Mazkur uchrashuv O‘zbekiston voleybolining xalqaro maydondagi nufuzini oshirish, yirik musobaqalarni mamlakatimizga jalb etish hamda voleybolni yangi bosqichga olib chiqish yo‘lidagi muhim qadamlardan biri bo‘ldi.